РОДИТЕЛИ ОД АКЦИЈА

Она што никогаш не би го повторила е да влезам во родителството сосема неподготвена. Се фокусирав само на очигледното, на видливото, на физичкото, а помалку очигледното, невидливото, нефизичкото го занемарив. Се насочив на телото, а психата и душата ги игнорирав. И тоа не пречеше многу до кај 2-та година од животот на детето. Потоа почнаа борбите. Борби меѓу 2 ега: моето и на детето. Секој влече на својата страна. Многу погрешни очекувања, кавги, нервоза, многу потенцијално драгоцени моменти претворени во дуел. Кулминацијата дојде со доаѓањето на второто дете, кога во игра влезе и трето его. Не можев веќе да се борам. Тогаш решив да кренам раце од директните борби глава со глава и да почнам да работам тактички: со ум, со свесност, со знаење. Инвестирав во себе. Во период од 4 години постојано се едуцирав преку различни едукации и експериментирав, применував, тестирав. Кога ги видов првите резултати, тоа беше знак дека сум на добар пат. Оттогаш постојано сум со некоја книга, работилница или курс. Ги проширив знаењата за развојната психологија, потребите на детето, и еден куп практични техники што ми го олеснуваат секојдневието. Сега го живеам тоа што го сонував на почетокот. Го разбирам детето, знам што му треба дури и кога на другите околу мене не им е очигледно, имам самодоверба со методите што ги користам, детето ме почитува и го прифаќа моето водство. Кога научив да водам, наместо да управувам, детето ја почувствува потребната слобода и доверба. Тоа значително ни го подобри односот што ни е темелот за сè што сакаме да изградиме заедно. Сакам придобивките што ги чувствувам јас да ги почувствуваат што поголем број родители. Ова е местото каде што заедно може да ја постигнеме таа цел.