Позитивна дисциплина

Позитивна дисциплина е начин на воспитување заснован на позитивно поттикнување, разбирање, охрабрување и конструктивна комуникација меѓу родителите и децата. За разлика од традиционалното поимање на дисциплината, позитивната дисциплина не подразбира казнување. Позитивната дисциплина подразбира насочување, учење, подготвување, обучување, градење вештини и фокусирање на решенија. Начелата на позитивна дисциплина ви помагаат вам и на децата да се чувствувате поттикнати и охрабрени преку неказнувачки методи со кои се учат важни социоемоционлни и животни вештини. Ваквите методи се засноваат врз:

• Меѓусебно достоинство и почитување

• Пренесување на пораката за љубов

• Создавање основа за нежно и цврсто родителување

• Сфаќање на грешките како можности за учење и развој

• Влегување во светот на детето – сфаќање дека ако детето се однесува несоодветно, тоа е знак дека детето е обесхрабрено; дека мора да ги откриеме и да се справиме со верувањата што го потхрануваат таквото однесување

• Овозможување на детето да ги истражува последиците од сопственото однесување наместо наметнување последици

• Семејни состаноци заради решавање проблеми и стекнување комуникациски вештини